انسان کمزور ہے، اس لیے اسے وقتاً فوقتاً اپنے اقوال، افعال اور رویّوں کا جائزہ لیتے رہنا چاہیے۔ کہیں ہماری کسی بات، کسی عمل یا کسی عادت سے کسی کی دل آزاری تو نہیں ہو رہی؟ یہ ممکن ہے کہ ہم کسی کو تکلیف دینے کا ارادہ نہ رکھتے ہوں، لیکن ہمارا اندازِ گفتگو یا طرزِ عمل دوسروں کے لیے اذیت کا باعث بن رہا ہو۔

انسان کو اپنی پرانی عادتوں پر نظرِ ثانی کرنا عموماً مشکل محسوس ہوتا ہے، کیونکہ جن باتوں کو وہ مدت سے درست سمجھتا آیا ہو، ان کی خامیوں کا احساس کم ہی ہوتا ہے۔ اسی لیے ضروری ہے کہ ہم اپنی عادتوں کو محض اپنی طبیعت کا حصہ سمجھ کر قبول نہ کر لیں، بلکہ دیانت داری کے ساتھ ان کا جائزہ لیتے رہیں۔

کسی کی دل آزاری معمولی بات نہیں: ہمیں چاہیے کہ روزانہ کچھ وقت اپنے محاسبے کے لیے مخصوص کریں اور صبح سے رات تک کے اپنے معمولات پر غور کریں کہ ہماری گفتگو، معاملات اور رویّوں میں کہیں کوئی ایسی بات تو نہیں جس سے کسی کو تکلیف پہنچی ہو۔

اگر ہم نے کسی کو ناحق اذیت پہنچائی ہے تو اس کی تلافی کریں اور آئندہ ایسی کوتاہی سے بچنے کے لیے اپنی اصلاح کی کوشش کریں۔

یہ محاسبہ اس احساس کے ساتھ ہونا چاہیے کہ ایک دن ہمیں اپنے اعمال کا جواب اللہ تعالیٰ کے سامنے دینا ہے۔ اس لیے بہتر ہے کہ ہم دنیا ہی میں اپنی کوتاہیوں کو پہچان کر ان کی اصلاح کر لیں، تاکہ آخرت میں ندامت کا سامنا نہ کرنا پڑے۔

اللہ تعالیٰ ہمیں اپنا محاسبہ کرنے، اپنی کوتاہیوں کو پہچاننے، حقوق العباد کی ادائیگی اور اپنے قول و فعل کی اصلاح کی توفیق عطا فرمائے۔ آمین!